Бүгін Қалалық психикалық денсаулық орталығында Халықаралық мейіргерлер күніне арналған салтанатты жиын өтті. Іс-шара барысында психиатриялық және наркологиялық көмекті дамытуға қосқан мейіргерлік қызметтің зор үлесі, сондай-ақ емделушілердің жанынан табылып, күн сайын қолдау көрсетіп жүрген мамандардың еңбегі ерекше атап өтілді.

Сонымен қатар, жиында ҚПДО мейіргерлік қызметінің жетекшісі де құттықталды.

Айман Аиповна Диярова психиатрия мен наркология саласына бүкіл саналы ғұмырын арнаған жан. Оның медицина саласындағы үздіксіз еңбек өтілі — 45 жыл.

Қатардағы мейіргерден мейіргерлік қызметтің жетекшісіне дейінгі жол — үлкен еңбек пен тәжірибенің, кәсібіне деген адалдықтың айқын көрінісі.

Бүгінде Айман Аиповна үлкен ұжымды басқарып, жас мамандардың кәсіби қалыптасуына бағыт-бағдар беріп келеді. Кезінде өзінен тәлім алған көптеген қызметкерлер бүгінде білікті маман әрі басшы атанған.

Психиатрия мен наркология саласында ең алдымен сабыр, түсіністік және диагноздың ар жағындағы адамды көре білу маңызды. Себебі әр пациент күн сайын өз ішкі күйімен, қорқынышымен, тәуелділігімен және өмірлік күресімен бетпе-бет келеді.

Мейіргер мамандығы — тек білім мен тәжірибе ғана емес. Бұл — күн сайынғы қамқорлық, жанашырлық және денсаулық сақтау жүйесінің ажырамас бөлігіне айналған үлкен рухани күш.